إســـتبضان وإستغــــــلال

قبل ما أبدأ في تنفيذ فكرة المدونة دي كان في حوار كده غريب جـــــــــــــدا كان ومازال بيخنقني مـــــوت لأنه بضين فحت بجد وأعتقد أنه نادرا لو حد فكر في الحوار اللي هقوله بنفس الأسلوب اللي أنا تعرضت بيه للموضوع ده
وعشان مطولش عليكم ولا أبضنكم أكتر فالموضوع يتمثل في الإبتذال والأستغلال البضين اللي زاد عن حـــده للجنس الناعم أو (المـــرأة) تجــــــــاريا وترويجيا
طبعا كتير هيقولوا أنتا جاي دلوقتي تدافع عن المرأة وإنتا اساسا مبهدلها فى أول وتاني بوست؟؟
هقوله لا أنا دلوقتي مش بدافع عن المرأة ولكن أتبضنت من الأستغلال التجاري الفاحش لكل ما يحمل صفة أنثى - طبعا لسه الفكرة مش واضحة لكن هوضحها بالتدريج
دلوقتي عاوزك مثلا تدخل المطبخ بتاعكم وتدعبس فيه شوية عن أكياس المكرونة والرز والسكر وأزايز الزيت وخلافه وكمان ياريت تدخل على التلاجة تبص فيها بصة صغيرة كده وهتلاحظ بعد كل ده قصدي من الموضوع وهو الأتي يا عم
هتلاحظ أنه ع الأقل بنسبة 95% من المنتجات اللي في مطبخكم وتلاجتكم تحمل أسم أو صورة كائن حي جنسه (أنثى) أو (Female)
وعشان متتعبش نفسك أنا هقولك على حاجة تضحكك مــــوت وهى إنك هتلاقي أن كل المنتجات دي تحمل أسم بنات وأسامي صريحة زي (سكر الشيماء - أرز الضحى - زيت حلوة - مكرونة الملكة - سمنة الهانم - إلخ إلخ...)
طبعا ممكن واحد فلحوص يقولي إن انا مزعل نفسي ليه لما كل المنتجات دي تخص المطبخ والطعام وأكيد اللي بتشتريها أو بتستعملها أنثى برضه - هقوله أصل البداية من المطبخ عشان تفهم باقي الموضوع لأن المطبخ أسهل مكان تفهم منه الحوار ده
لكن لو بحثت أكتر هتلاقي أن المشكلة مش في وجود أسم أنثى أو صورتها على المنتج - ولكن المصيبة أن حتى الترويج للمنتج مش بينفع إلا بالبنات المزز الحلوين كمان - يعني هتلاقي أن الإعلانات على التليفزيون بنسبة 85% تعتمد أساسا على البنات المزز الدلوعة مـــــــــوت ونادرا لما تلاقي إعلان لمنتج ناجح وبيعتمد على الراجل أو الذكر في الترويج ليه (زى إعلانات إتصالات أوبشنز مع أحمد مكي) - ولكن الغالبية العظمى لازم تعتمد على النسوان فى الترويج حتى في منتجات العناية بالرجل زى (جيليت - لا كوست - هير كود - وكل منتجات العناية بالرجل) وبتلاقي واحدة مزة لابسة قصير ومتشعبطة فى الراجل من دول وهو بيحلق دقنه المحلوقة اساسا وكأنها يعني عمرها ما شافت رجالة قبل كده - وده دليل على جاذبية البيه اللي هيستعمل المنتج ده لو أشتراه - قال يعني مش هينفع يشتريه لو الراجل اللي في الأعلان حلق دقنه وبص فى المرايا وقال لنفسه يا واد يا جـــــــــامد وخلص الإعلان على كده
ووصل الموضوع مداه لدرجة أن حتى المنتجات اللي إنتا أشتريتها فعلا برضه تحتوي على مزز ووجع قلب - حتى في الأتصالات بتلاقي الكتالوج بتاع الموبايل أو الجهاز أو خــــــط الموبايل نفسه كله بنات بتضحك وتهرج وتتنطط وشعرها طاير وكأنك أشتريت قرية سياحية مش مجرد موبايل ولا خط تليفون
ممكن حد يقول أن الترويج بيعتمد على الإبهار البصري وعشان كده بيحطوا مزز في الإعلانات - طب يا بضان ليه حتى الإعلانات على الراديو بصوت بنات فى قمة الوساخة وقلة الأدب وأصوات أقسم بالله أن أى راجل متجوز مش بيسمع مراته بالصوت الناعم ده ولا الطريقة اللي بتكون فيها البت منهم على الراديو - هتقولي أن أم الترويج كمان لازم يكون فيه إبهار سمعي بصوت واحدة دلوعة؟؟؟؟
في إعلانات كتير جدا نجحت وبقت علامة بارزة في ذاكرة شباب وناس كتير من جيلنا والأجيال اللي قبلنا وكانت الإعلانات دي لا تعتمد أساسا على البنات - زى على سبيل المثال وليس الحصر (إعلان موبليا عبد الرحيم عمرو اللى كان بالكارتون والراجل الأصلع اللي شبه حسن حسني بيقول للواد أبو نضارة ما تتجوز والتاني بيرد عليه ويقول أجيب جهازى منين ؟؟ وفي الأخر قعدوا يغنوا أحتكم الأمر من عبد الرحيم عمرو وهتجوز يا جماعة - والإعلان ده كان فكرة المبدع طارق نور اللي خاب بعد كده وبقت أعلاناته كلها مزز)وكمان عندك مثلا (إعلانات بيبسي بتاعة كأس الأمم اللي فاتت لما كان الراجل بيقول : ياترى وراهم مين؟؟)
المــــــوضوع بجد بقى بضان فشخ وأن أتفقعت مرارتي منه بجد لأن خلاص المجتمع بقى يعتمد على الأنثى في كل شىء حتى في التجارة والترويج - طب يا ناس يا بضان ماهو في منتجات كتير جدا ماشية زي الفل بدون الأعتماد على أى مزة أساسا - يعني مثلا دولة زى السعودية مش هتلاقي العك بتاعنا في منتجاتهم - الأعلانات كلها حيوانات وأطفال ونسوان محجبة عمالة تشرب ولادها عصير تــــــــانج - وكمان أسامي المنتجات مؤدبة كده ولذيذة
يعني أنا أفتكر أن في حاجات شغالة هناك زي الحريقة مع أن لا أسمها أسم أنثى أو عليها صور والبضان ده زى (جبنة أبو ولد - كيري - زيت مازولا - الجوال - أندومي) تقريبا معظم منتجاتهم تخلو تماما من أى صفة أنثوية وبالرغم من كده الحاجة بتتباع والأقتصاد مزدهر وزى الفل - يعني هو لازم العربية الكامري هناك يتروج ليها ببنات مزز خليجيات عشان تتباع؟؟ طبعا كله شغال زي الفل بدون النسوان مع العلم أن نسوانهم بقى وشهادة أتحاسب عليها يوم الدين يضربوا نسوان بلدنا بالصرمة الأديمة
وعاوزك تفتح برضه كتالوج اي خط جوال عندهم ولو لقيت صورة اساسا ابقى قابلني - وبالرغم من كده سوق الأتصالات عندهم أحسن من عندنا خمسين مرة
معنى كده أن الترويج مش شرط يعتمد على المرأة بالصورة البضان المبتذلة دي فى بلدنا - وأن المنتج الناجح بيتروج على أساس السمعة مش على أساس مزة شقرة ولابسة أميص نوم على علبة كريم الشعر - ولا على أساس أي هانم بتستحمى وخارجة بالبشكير عشان سخان العــــــــــمر يتباع
ياترى هيجي يوم نلاقي في حاجات بيتروج ليها وتتباع بدون أستغلال المرأة ولا هنفضل بضان ومتخلفين طول عمرنا وقال إحنا أول ناس بننادي بحرية المرأة قال
وطبعا الموضوع لسه أكبر من كده بس أنا مش عاوز أبضن أكتر ما الموضوع بضين خلقة - يعني لو دخلت في أستغلال المرأة إعلاميا يبقى مش هنخلص وهحتاج بلوج بحاله للموضوع ده لوحده - أبسط حاجة أن مفيش أي قناة تليفزيونية عربية تخلو من المذيعات وإن المذيعين الرجالة تقتصر وظيفتهم على نشرات الأخبار وبرامج الرياضة وشكرا على كده
حتى الترويج للقناة نفسها يعتمد بشكل كامل على المزز زي (بوبي) بتاعة ميلودي ولا المزز بتوع قناة زووم وغيرهم وغيرهم
أنا أتبــــــــــــــــضنت خلاص وكفاية كتابة فى الموضوع ده