إحنا مين أساسا؟؟

في البداية أحب أعتذر عن طول فترة الغياب اللي فاتت واللي استمرت تقريبا 4 أسابيع وده لظروف خارجة عن الأرادة ولكن الحمدلله وكالعادة راجع بعد غياب ومبضون أكتر من الأول طبعا وعندي كلام كتير وكــــــــــــــبير فحت عاوز أقوله هنا في مدونتي العزيزة

وأحب أستأنف عرضي لبضان مجتمعنا المصري بموضوع كان ومازال شاغل بالي جدا وبصراحة مش هكون ببالغ لو قولت أنه موضوع حساس ومهم ومن الغريب جـــــــــــدا أنه مش بيثير فضول أي أعلامي أو صحفي في بلدنا ويتكلم فيه

والحوار كله النهاردة عن الهوية المصرية من خلال المظهر أو الأستايل بتاع البشر بتوعنا أو بالعربي كده مظاهر وطرق اللبس بتاعة الشعب المصري

بأختصار مش هقول غير إني عاوزك تركب بكرة الصبح أتوبيس 979 من فيصل وتنزل يا عم فى القصر العيني - الرحلة دي بالظبط هتاخد منك حوالى ساعة في الأتوبيس العظيم ده اللي بضرب بيه المثل كأكبر علبة سردين فى العالم - أصل على حد علمي أن الأتوبيس بتاعة هيئة النقل العام مينفعش ياخد أكتر من حوالى 60 بني أدم ولكن فى المعجزة اللي رقمها 979 هتلاقي الرقم ممكن يتجاوز 150 نفس بشرية

وطبعا الأتوبيس ده أرض خصبة جدا للموضوع بتاعي - لأني عاوزك زي الشاطر كده تقولي إيه اللي بيميز الشعب المصري كشعب عربي وشرقي عن باقي الدول من حيث المظهر؟؟

يعني فى الخليج هتلاقي الرجالة لابسين التـــــــــوب ( الجلابية ) والنسوان لابسة العبايات والشيلة طبعا - وفى السودان هتلاقي نفس الحوار بس النسوان لابسين حاجة كده ألوان كتير وبتتلف على جسمهم كده بس شكلها مميز ومعرفش اسمها إيه - ولو روحت المغرب هتلاقي طبعا لبسهم مميز بالقفطان والحوارات دي والعبايات المغربية - يعني تقريبا كل بلد عربي وشعبه مميز بأستايل معين وبيفخر بيه كمان - يعني تلاقي السعودي راكب عربية هـــــــــامر بس لابس التوب الأبيض والشماغ عليه أو الغترة وكل ده على شبشب وبالكتير جزمة جلد

إنما بقى تعالى نرجع لأتوبيسنا الحبيب 979 واللي بيمثل كافة طوائف الشعب المصري

هنركن الجماعة الأقباط على جنب عشان ميخصوناش في حاجة وهما مبسوطين كده بلبسهم اللي عفى عليه الزمن وبيعتبروا أن ليهم أستايل خاص ( اللبس المهلهل والشعر اللي مضروب ألوان ومش متغطي وكمان الصليب الدهب ) وطبعا تقدر تميز أي أخ أو أخت مسيحية من أستايله

أنما بقى تعالى نشوف باقي البشر في الأتوبيس - هتلاقي اللي مش مغطية شعرها - والمنقبة - واللي لابسة إيسدال - واللي لابسة عباية وشايفة نفسها - والمحجبة الروشة - والمحجبة الخنيقة اللي لابسة مقاس أكبر منها 3مرات - وهتلاقي المحجبة اللي مزحلقة الحجاب لحد قفاها - وهتلاقي الست الريفية أم جلابية زفرة - وأخيرا هتلاقي اللي لابسة خمار وكمان خمار لونه بـــــــــــــــــــرتقالي

بصراحة ده عصير كوكتيل مش مظهر شعب - يعني نفسي أفهم مين فيهم الصح وهو اللي بيمثل شعب مصر؟؟؟

وتعالى بقى نشوف الرجالة - هتلاقي راجل بجلابية وفاكر نفسه الشيخ زايد - وعندك عمنا الباكستاني اللي لابس بتاع عامل زي التونيك بتاع البنات على بنطلون كده - وتشوف الراجل أبو بدلة - وأبو أميص وبنطلون - وعندك الشباب الروشة اللي لبسها عبارة عن لوحة تشكبلية وكرنفال ملابس يا عيني

يعني هتلاقي أن ال150 بني أدم اللي فى الأتوبيس عبارة عن مزيج من الحضارات والشعوب بكافة الأنتماءات

هتقولي وأنتا زعلان ليه طالما أساسا أننا بنقول أن مصر مزيج من الحضارات وهي أصل كل الشعوب - هقولك زعلان عشان أزاي بنقول أنا مصري وأبن مصري وأبن مصر الله عليه؟؟؟

قولي إيه المميز في أبن مصر ولا حتى بنت مصر عشان تطلعهم من وسط باقي الشعوب؟؟

إحنا لولا اللغة العامية مش هنبقى مصريين

أنا تقريبا مكنتش موجود أيام الأحتلال الإنجليزي لكن أعرف أن الشعب كله بأختلاف طوائفه ومعتقداته كان مظهره وأستايله واحد

شوف كده فيلم قصر الشوق وهتلاقي أن كل الرجالة كانوا لابسين البدلة والطربوش - والنسوان لابسة الملاية اللف أو الملس وعليه الخمار أو النقاب

يعني في يوم من الأيام قدرنا كمصريين أنه يكون لينا شكل ومظهر واحد على مستوى الدولة كلها - أمال إيه اللي بيحصل اليومين دول؟؟

بصراحة أنا حاسس أننا هنبقى عاملين زي لبنان كده وهنكون طوائف وكل طائفة دلوقتى أختارت مظهرها ولبسها وحتى الإعلام بتاعها

هتلاقي المسيحيين عندهم قناة ساويرس - والمصريين القادمين من الخليج بيتفرجوا على قناة دبي وأقرأ - أما الجماعة بتوع الجمعية الشرعية بيتفرجوا على قناة النـــــــــاس

حتى الإعلام بقى بيكرس فكرة الطوائف والأختلاف وإنك لازم تتفرج على إعلام مختلف لإنك تستحق الإختلاف

بجد بجد الموضوع بقى يقرف وبضان جــــــــــــــــــــدا وأنا مش قادر أوصف خنقتي من الحاجات البسيطة دي اللي مفيش حد بتلفت نظره أو بيتكلم فيها - وإنما فالحين بس نتكلم عن إصدار قانون ضد التحرش الجنسي وكل بنت يشيلوا معاها صـــــــــــــاعق قوته مليون فولت بحيث أن لو شاب قل عقله وفكر يقولها يا قمـــــــــر تروح تصعقه بمليون فولت في بضانه وتقتله بموجب قانون التحرش

لما توحدوا لبسكم يا هايفة منك ليها أبقوا أتكلموا عن قانون التــــــــــــــــــــحرش ونبقى نعمل مشروع صاعق لكل بنت على غرار كومبيوتر لكل طالب

ويجعله عـــــامر يا شعب مصر

تحـــــديث : سقط سهوا من الحوار ده إني أقول أني مش ضد أي أستايل أو شكل معين من الأشكال اللي ذكرتها سابقا - يعني أنا لا بشجع النقاب ولا ضد الحجاب المزحلق - ولكن أتمنى نوصل لأستايل ومظهر شبه موحد وبيعبر عن الروح المصرية أولا والأسلامية ثانيا والعربية ثالثا ونبطل بقى البزراميط والكوكتيل الحمضان اللي إحنا فيه ده